له‌ رۆژهه‌لاتی‌ كوردستانی‌ ناوه‌ كوردییه‌كان‌ له‌ ناسنامه‌ی‌ ئێرانی‌ ده‌گاته‌ به‌رزترین ئاست

وێنه

ناوه‌ندی‌ ئه‌نیستیتۆی‌ ئه‌حمه‌دی‌ خانی‌ كه‌ له‌ شاری‌ ورمێیه‌ له‌ داخوازی‌ نامه‌یه‌كدا" بۆ سه‌رجه‌م دانیشتوانی‌ پاریزگای‌ ئازربایجانی‌ رۆژئاوا" رایگه‌یاندووه‌:"بۆ ئاسانکاری له هه‌ڵبژاردنی نێوی کوردی سه‌ردانی ناوه‌ندی ئه‌نیستیتۆی ئه‌حمه‌دی خانی بکه‌ن." هه‌ر له‌ بانگه‌وازه‌كه‌ی‌ ئه‌م ناوه‌نده‌ هاتووه‌ "ئه‌م ماڵباتانه‌ی ده‌یانه‌وێ ناوی کوردی بۆ زارۆکی خۆیان هه‌ڵبژێرن، بۆ ئاسانکاری یاسایی و ناردنی نامه بۆ ئیداره کوللی سه‌بتی‌ ئه حوال ئازه‌ربایجانی ڕۆژئاوا سه‌ردانی ئه‌نیستیتۆی خانی بکه‌ن. ئه‌م بانگه‌وازه‌ بۆ جاریكی‌ تر پرسی‌ ناولێنانی‌ منالانی‌ كوردی‌ له‌ به‌ریوه‌به‌ری‌ ره‌گه‌زنامه‌ی‌ ئێرانی‌ هیناوه‌ته‌ گۆری‌، پرسێك ئه‌گه‌رچی‌ ئیستاش سپێردراوه‌ به‌ فه‌رامۆشی‌. تو بلێی‌ پرسی‌ ناو لینانی‌ مناڵانی‌ كورد‌و كاروباره‌ یاسایی‌‌و ئیدارییه‌كانی‌ له‌ به‌ریوه‌به‌رایه‌تیه‌كانی‌ ره‌گه‌زنامه‌ چ یاسا‌و ریسایه‌كی‌ هه‌بێت، له‌ هه‌مووی‌ گرنگتر خودی‌ هاولاتیان‌و خاوه‌ن رایان چون له‌ سه‌ر ئه‌م پرسه‌ قسه‌ بكه‌ن. هه‌وڵی‌ ئه‌م راپۆرته‌ خویندنه‌وه‌ی‌ ئه‌م پرسه‌یه‌ له‌ كوردستان‌و به‌و هیوایه‌ی‌ بتوانێت تیشك بخاته‌ سه‌ر رێكاره‌ یاسایی‌‌و سیاسیه‌كانی‌ ئه‌م حاڵه‌ته‌ له‌ كوردستانی‌ ئێران‌و ده‌لاقه‌یه‌كیش بیت بۆ به‌دواداچونی‌ زیاتر. ماده‌ یاساییه‌كان ناونانی‌ مناڵ له‌ ئێران له‌ یاسای‌ ره‌گه‌زنامه‌ی‌ ئێرانی‌ تایبه‌ت به‌ ناو نانی‌ مناڵ‌و له‌ ماده‌ی‌ (12)ی‌ ناونوسینی‌ مناڵان له‌ به‌ریوه‌به‌ری‌ ره‌گه‌زنامه‌ی‌ ئێرانی‌ هاتووه‌ كه‌: " هه‌لبژاردنی‌ ئه‌و ناوانه‌ی‌ ببێته‌ هۆی‌ سووكایه‌تی‌ به‌ پیرۆزییه‌كانی‌ ئیسلام‌و ئه‌و ناوانه‌ی‌ كه‌ ناكۆكن له‌ گه‌ل ره‌گه‌زی‌ منداڵه‌كه‌ قه‌ده‌غه‌یه‌". له‌ بڕگه‌یه‌كی‌ دیكه‌ی‌ ئه‌و ماده‌یه‌ هاتووه‌‌:"هه‌لبژاردنی‌ ناو بۆ ئه‌و كه‌مایه‌تیه‌ دینییانه‌ی‌ كه‌ له‌ یاسای‌ ئێران هاتوون به‌ پێی‌ زمان‌و كه‌لتوری‌ مه‌زهه‌بیان ده‌بیت". له‌ برگه‌یه‌كی‌ دیكه‌ی‌ هه‌مان ماده‌ هاتووه‌:" هه‌موو ئه‌و ناوانه‌ی‌ هه‌ڵده‌بژیردرین ده‌بێت له‌ چوارچیوه‌ی‌ بنه‌ماكانی‌ ئێرانی‌ ـ ئیسلامی‌ بگونجیێت". حكومه‌ت له‌ گه‌ل گرتنه‌ پێشی‌ ئه‌م یاسایه‌، هاوكات كتیبێكی‌ مۆله‌ت پێدراوی‌ به‌ سه‌ر به‌رێوه‌به‌ری‌ ره‌گه‌زنامه‌كان بڵاوكردوه‌ته‌وه‌ كه‌ پڕن له‌ ناوی‌ پێشنیاری‌ كراوی‌ ئیسلامی‌‌و ئێرانی‌‌و له‌ سه‌ر سایتی‌ ریكخراوی‌ ره‌گه‌زنامه‌ی‌ ئێرانیش لینكی‌ ناوه‌ پَشنیارو په‌سندكراوه‌كان دانراوه‌. هه‌ر چه‌ند له‌ هه‌موو ئه‌و رێوشوێنه‌ یاساییانه‌‌و به‌ سه‌رنجێكی‌ خێراش به‌ ناوه‌ پیشنیاركراوه‌كان، به‌و ئه‌نجامه‌ ده‌گه‌ین جیاوازی‌ پیكهاته‌ ئایینی‌‌و نه‌ته‌وه‌ییه‌كان له‌ ئێران له‌ به‌ر چاو نه‌گیراون، ئه‌مه‌ له‌ گه‌ڵ ئه‌وه‌ی‌ كه‌ گۆرانكاریه‌ سیاسی‌و كه‌لتوریه‌كانیش جێی‌ تیادا نه‌كراوه‌ته‌وه‌ كه‌ ده‌كرێت هه‌ر كام له‌و گۆرانكاریانه‌ ناوی‌ نوێ‌ به‌ دوای‌ خۆیدا بێنیت. دیاره‌ ده‌بیت ئاماژه‌ به‌وه‌ش بكه‌ین كه‌ له‌ كتێبی‌ مۆله‌ت پیدراوی‌ به‌ریوه‌به‌ری‌ ره‌گه‌زنامه‌ ناوه‌ كوردییه‌كان نه‌هاتوون. هه‌ر چه‌ند له‌ كتیبه‌كه‌ش دا به‌ ره‌سمی‌ هیچ ناوێك له‌ ده‌ره‌وه‌ی‌ كتیبه‌كه‌ قه‌ده‌غه‌ نه‌كراوه‌، به‌لام زانراوه‌ ناوه‌ قه‌ده‌غه‌ كراوه‌كان له‌ لایه‌ن ئه‌نجومه‌نێكه‌وه‌ به‌ ناوی‌ ئه‌نجومه‌نی‌ بالای‌ سه‌بتی‌ ئه‌حوال دیاری‌ كراون‌و ره‌وانه‌ی‌ هه‌موو به‌ریوه‌به‌رایه‌تیه‌كان كراون. ناو له‌ سزادانه‌وه‌ بۆ خه‌لاتكردن! له ‌ئێران به ‌پیچه‌وانه‌ی‌ زۆرێك له‌ ولاتان ده‌كرێت ناوێك سزای‌ له‌ سه‌ر بێت وه‌ك ئه‌وه‌ی‌ له‌ شناسنامه‌‌ به‌و ناوه‌ نه‌كرێت یا به‌ پیچه‌وانه‌ ده‌كرێت خاوه‌نی‌ ناوه‌كه‌ خه‌لات بكرێت، ئه‌گه‌ر چی‌ هه‌ر دوو حاڵه‌ته‌ باری‌ یاسایی‌ نیه‌، به‌لام جێبه‌جێ‌ كراون. له‌ ئێران هه‌ر سزا بۆ ئه‌و بنه‌مالانه‌ به‌ په‌سندنه‌كردنی‌ ناوی‌ دلخوازی‌ خۆیان بۆ مناله‌كانیان دیاری‌ نه‌كراوه‌، به‌ڵكو ئه‌و ناوانه‌ی‌ كه‌ جێگای‌ په‌سندی‌ حكومه‌ت بێت، زۆرجار‌و به‌شیوه‌ی‌ سالانه‌‌و له‌ بۆنه‌كان، خاوه‌نه‌كانیان ته‌شویق ده‌كرێن‌و خه‌لاتیش وه‌رده‌گرن! بۆ نمونه‌ خاوه‌نانی‌ ناوی‌"زینب"،"مه‌هدی‌"،"عه‌لی‌"،و... له‌ سالرۆژی‌ له‌ دایكبوونی‌ ئه‌م ئیمامانه‌ خه‌لاتده‌كرێن. حكومه‌ت زۆربوونی‌ ناوه‌ ئیسلامیه‌كان له‌ سه‌ر منالان‌و به‌ تایبه‌ت ناوی‌ ئیمامانی‌ شیعه‌ وه‌ك ده‌سكه‌وتیك سه‌یر ده‌كات‌و هه‌ر جار ناجاریك رێژه‌ی‌ ناوی‌ ئه‌و ئیمامانه‌ی‌ كه‌ له‌ سه‌ر منالان نراون بلاو ده‌كاته‌وه‌. بۆ نمونه‌ سایتی‌ ره‌گه‌زنامه‌ی‌ ئێران له‌ تازه‌ترین ئاماردا بلاویكرده‌وه‌ كه‌ یه‌ك میلیون‌و نۆسه‌د هه‌زار ئێرانی‌ ناویان (حسین)ه‌‌و رێژه‌ی‌ ئه‌و كه‌سانه‌ش ناویان (زینه‌ب)ه‌ به‌ 886هه‌زار كه‌س راگه‌یاندووه‌. له‌م دوایانه‌ش دا سایتی‌ فه‌رمانداری‌ مه‌هاباد وه‌ك سه‌ركه‌وتنیێك له‌ مانه‌وه‌ی‌ ناوی‌ ئایینیه‌كان رایگه‌یاند:"ناوه‌كانی‌ ئه‌سرا‌و محه‌مه‌د زۆرترین ئه‌و ناوانه‌ی‌ بوون له‌منالانی‌ كورد‌و كچ نراون له‌ شاره‌كه‌". له‌ سه‌ر ئاستی‌ نه‌ته‌وه‌یی‌، ئایینی‌ ‌و ئیرانی‌ ئێران ولاتێكی‌ فره‌ میوزائیكه‌و هه‌لبژاردنی‌ ناوی‌ مناڵان له‌م چه‌ند ساڵه‌ی‌ دوایی‌ به‌ جوانی‌ ئه‌م فره‌ میوزائیك بوونه‌ ده‌خاته‌ روو. به‌ پێی‌ هه‌والێك كه‌ له‌ سایتی‌ فه‌رمانداری‌ شاری‌ مه‌هاباد بلاوكراوه‌ته‌وه‌ دوای‌ ناوه‌كانی‌: "اسرا"‌و"محمد"، ناوه‌ كوردیه‌كانی‌ وه‌ك نارین، هاوژین، ئالینا، سوژین، هانا، سارینا، نیان و په‌ریا " زۆرترین ریژه‌ی‌ به‌ كارهینانی‌ تۆمار كردووه‌. به‌ پێی‌ ئه‌و هه‌واڵه‌ زیاتر له‌ سه‌دا (50)ی‌ ناوه‌كان كوردین‌و خه‌لكی‌ ده‌گه‌رێنه‌وه‌ بۆ لای‌ ناوه‌ كوردیه‌كان كه‌ ئه‌مه‌ش به‌ سه‌رنجدان به‌ سیاسه‌تی‌ ئاسیملاسیونی‌ حكومه‌ت به‌رامبه‌ر به‌ كورده‌كان‌و قه‌ده‌غه‌ كردنی‌ هه‌ر چه‌شنه‌ كاری‌ سیاسی‌‌و فه‌رهه‌نگی‌ جێگای‌ ره‌زامه‌ندیه‌ كه‌ خه‌لك له‌ رووی‌ كه‌لتوریه‌وه‌ به‌رپه‌رچدانه‌وه‌ی‌ خۆیان هه‌یه‌. به‌ پێی‌ ئامارێكی‌ ناره‌سمی‌ ‌و ته‌ئید نه‌كراو كه‌ ده‌ست ریپۆرته‌ی‌ ئه‌م راپۆرته‌ كه‌وتووه‌ رێژه‌ی‌ ناوه‌كان له‌ روی‌ نه‌ته‌وه‌یی‌، ئایینی‌‌و فارسی‌ له‌ كوردستانی‌ ئێران ده‌توانین به‌ مشیوه‌یه‌ ریز به‌ندیان بۆ بكه‌ین. ناوه‌ كوردیه‌كان له‌ سه‌دا 60 ناوه‌ ئایینه‌كان له‌ سه‌دا 20 ناوه‌ فارسیه‌كان له‌ سه‌دا 10 ئه‌م ئاماره‌ ئه‌وه‌ ده‌خاته‌ روو كه‌ ناوه‌ كوردیه‌كان له‌ كوردستان به‌ پله‌ی‌ یه‌كه‌م دێت‌و دوای‌ ئه‌وه‌ش ناوه‌ ئایینیه‌كانه‌‌و له‌ پله‌ی‌ سێهه‌میش ناوه‌ فارسیه‌كان دێت. دیاره‌ به‌رزبوونه‌وه‌ی‌ ناوه‌ كوردیه‌كان له‌ گه‌ڵ ئه‌وه‌ی‌ كه‌ دیارده‌یه‌كی‌ باشه‌، هاوكات نزمبونه‌وه‌ی‌ ناوه‌ ئایینیه‌كان به‌ تایبه‌ت ئایینی‌ سوننه‌ كه‌ مه‌زهه‌بی‌ زۆرینه‌ی‌ خه‌لكه‌ رای‌ جیاوازی‌ دروستكردووه‌. بۆ نمونه‌ ناوه‌كانی‌: عومه‌ر، عائیشه‌، ئه‌بوبه‌كر‌و عوسمان نه‌ك هه‌ر كه‌م بووه‌ته‌وه‌ له‌ زۆر ناوچه‌ی‌ كوردستان گه‌یشتووه‌ به‌ رێژه‌ی‌ سفر. ئه‌مرۆ كه‌س ئاماده‌ نیه‌ ئه‌و ناوانه‌ له‌ مناله‌كانیان بنێن، ئیستا منداڵ نابینرێت هه‌ڵگری‌ ئه‌و ناوانه‌ بن. كارناسێكی‌ ئه‌و بواره‌ به‌ ئاماده‌كه‌ری‌ راپۆرته‌كه‌ی‌ ووت:" نێوی ئایینی سوننه‌ ئێجگار که‌م بووه‌ته‌وه‌، نه‌ک له‌به‌ر ئه‌وه‌ی سیجیلی پێ نه‌ده‌ن به‌لکو دایک و باوکه‌کا‌ن نیگه‌رانی داهاتوی مناله‌که‌یانن. ئیستخدام نه‌بێ یان له‌ کونکۆر قه‌بول نه‌کرێ یان له‌ سه‌ربازی عه‌زێت بکری و".... كاردانه‌وه‌كان! فه‌یزولڵا پیری‌ رۆژنامه‌نوس له‌ ئێران له‌ وه‌لامی‌ ئه‌و پرسیار كه‌ له‌ ئیران ئایا ناولینانی‌ ناوی‌ كوردی‌ له‌ منالانی‌ كورد له‌ ئیداره‌ی‌ سه‌بت ئه‌حوالی‌ ئیران قه‌ده‌غه‌یه‌ یا ئازاده‌؟ ووتی‌: هه‌م قه‌ده‌غه‌ ‌و هه‌میش ئازاده‌. كارمه‌ندێكی‌ به‌ریوه‌به‌ری‌ ره‌گه‌زنامه‌ كه‌ نه‌یویست ناوی‌ بڵاوبێته‌وه‌ له‌ په‌یوندی‌ گه‌ل كۆسپه‌ یاسایی‌‌و ئیداره‌كانی‌ ناولێنانی‌ ناوی‌ كوردی‌ له‌ منالان رایگه‌یاند : "هیچ كۆسپێكی‌ یاسایی‌ نیه‌ مه‌گه‌ر ناویك زۆر ناشیرین‌و بی‌ مانا بیت‌و ئه‌و كۆسپه‌ش هه‌ر بۆ كورد نیه‌ له‌ شاره‌كانی‌ تریش په‌یره‌و ده‌كریت". هه‌ژار ئاریانفه‌ر ده‌لێت: ره‌نگه‌ كیشه‌كه‌ زیاتر سه‌لیقه‌یی‌ بیت، تا یاسایی‌، بۆ نمونه‌ ناوێك ئه‌گه‌ری‌ زۆره‌ له‌ پیرانشار كێشه‌ بیت، به‌لام له‌ مه‌هاباد كێشه‌ نه‌بیت. ووتیشی‌ ناوه‌ كوردییه‌كان چه‌ند سالێكه‌ سه‌رنجی‌ خه‌لكی‌ راكێشاوه‌‌و به‌ تایبه‌ت ئاماژه‌ی‌ به‌وه‌ دا كه‌ ناوه‌كانی‌ وه‌ك زیلان. ڤیان . ئه وین. له زگین سه روک. سه‌رهات له‌ ورمی‌ له‌ به‌ره‌و دان. سه‌رچاوه‌ی‌ ناوه‌ كوردییه‌كان! له‌ هه‌ر سه‌رده‌م‌و زه‌مه‌نیكدا ژماره‌یه‌ك ناو ده‌بن به‌ جیگای‌ په‌سندی‌ گشتی‌‌و هه‌ندێك ناوی‌ تریش وه‌لا ده‌نرێن، ئیستا له‌ كوردستانی‌ ئێران بنه‌ماڵه‌كان ناوی‌ كوردی‌ هه‌ڵده‌بژیرین بۆ مناله‌كانیان‌و بۆ ئه‌مه‌ش هه‌ندێكیان په‌نا ده‌به‌نه‌ به‌رئه‌و ناوه‌ كوردیانه‌ی‌ له‌ كوردستانی‌ باشور له‌ منالان نران. یا ده‌گه‌رینه‌وه‌ بۆ ناوه‌ كۆنه‌كانی‌ كوردستانی‌ باستان‌و ئه‌و ناوانه‌ی‌ له‌ سه‌رده‌می‌ ماده‌كان‌و زه‌رده‌شت هه‌بوون‌و ئه‌مه‌ له‌گه‌ل ئه‌وه‌ی‌ ئه‌و كتیبه‌ كوردیانه‌ش یارمه‌تیده‌ری‌ باشن كه‌ بۆ ناوی‌ منالان چاپ كراون له‌ كوردستانی‌ باشور. حه‌سه‌ن یه‌ك له‌و كه‌سانه‌یه‌ كه‌ هاوسه‌ره‌كه‌ی‌ منداڵی بووه‌‌و وه‌ك خوی‌ ده‌لێت ته‌له‌فون بۆ برایه‌كی‌ ده‌كات كه‌ پیشمه‌رگه‌یه‌ له‌ باشور بۆ ئه‌وه‌ی‌ ناوێكی‌ كوردی‌ بۆ منداڵه‌كه‌ی‌ هه‌لبژیرێت. دواجار ناوی‌ منداڵه‌كه‌یان ناوه‌ كۆمار، ئه‌گه‌ر چی‌ له‌ به‌ریوه‌به‌ری‌ ره‌گه‌زنامه‌ پێیان ووتوه‌ ئه‌م ناوه‌ عیراقیه‌و له‌ كتیبی‌ سه‌بتی‌ ئه‌حوالیش نیه‌، قه‌ده‌غه‌كردنی‌ ناره‌سمی‌‌و ره‌سمی‌ ناوه‌ كوردییه‌كان له‌ كوردستان زۆرجار وایكردوه‌ مندال دوو ناوی‌ هه‌بێت، ناوێك كه‌ په‌سندی‌ به‌ریوه‌به‌رایه‌تی‌ ره‌گه‌زنامه‌ی‌ ئێرانه‌و ناوێكی‌ تر كه‌ په‌سندی‌ بنه‌ماله‌كه‌یه‌، دیاره‌ هه‌ندێك حاڵه‌تی‌ كه‌می‌ دوو ناوه‌ش هه‌بووه‌ وه‌ك ناوێك بۆ ئه‌م دنیایه‌‌و ناوێكی‌ تر بۆ ئه‌و دنیای تر، به‌لام ئیستا ئه‌مه‌ نه‌ماوه‌. یا هه‌بووه‌ دوای‌ گه‌وره‌بوونی‌ ناوی‌ خۆی‌ گۆریوه. له‌ ئێران چی‌! ئه‌م حاڵه‌ته‌ هه‌ر له‌ نێو كورده‌كان نیه‌، به‌ڵكو نه‌ته‌وه‌كانی‌ تری‌ ئیرانیشی‌ گرتووته‌وه‌و بنه‌ماڵه‌كان كار له‌ سه‌ر گه‌رانه‌وه‌ بۆ ناسنامه‌ی‌ نه‌ته‌وه‌یی‌ خۆیان ده‌كه‌ن له‌ ریگای‌ هه‌لبژاردنی‌ ناوی‌ نه‌ته‌وه‌یی‌ تایبه‌ت به‌ خۆیان، بنه‌ماله‌ فارسه‌كانیش بۆ ناونانی‌ مناله‌كانیان ده‌گه‌رینه‌وه‌ بۆ رابردوویه‌كی‌ دووری‌ پیش ئیسلام وه‌ك ئه‌و ناوانه‌ی‌ له‌ شانامه‌ی‌ فیرده‌وسی‌‌و به‌لگه‌نامه‌ پارسیه‌كان هاتووه‌ كه‌ ئه‌مه‌ش وه‌ك دژایه‌تیه‌ك له‌ گه‌ل حكومه‌تی‌ ئیستا سه‌یر ده‌كریت. سایتی‌ ئه‌نجومه‌نی‌ مافی‌ ژنانی‌ ئیرانی‌ له‌ راپۆرتیكی‌ په‌یوه‌ندیدار نوسیبووی‌ له‌ باخچه‌ی‌ ساوایانی‌ ئێران ئیستا منالت ده‌ست ناكه‌وی‌ ناوی‌ فاتمه‌‌و حه‌سه‌ن بیت، به‌لكو ناوه‌كانی‌ ئاراد، ئایناز، ئاردۆش‌و هیلیاو...ناوه‌ په‌سنده‌كانن لای‌ بنه‌ماله‌كان. شیوا خانمێكی‌ فارسه‌ ویستویه‌تی‌ ناوی‌ "ارشام" بۆ كوره‌كه‌ی‌ هه‌لبژیریت، به‌لام له‌ ره‌گه‌زنامه‌ پێیانوتووه‌ ئه‌و ناوه‌ جوله‌كه‌یه‌‌و نابێت‌و به‌ ناچاری‌ ناوی‌ مناله‌كه‌ی‌ ده‌نێن "ئارشیا" كه‌ ناوی‌ یه‌كێك له‌ قاره‌مانه‌كانی‌ شانامه‌یه‌. مه‌رجه‌كانی‌ گۆرینی‌ ناو‌و ناز ناو به‌ پێی‌ هه‌ر 45 ماده‌كه‌ی‌ ئه‌نجومه‌نی‌ بالای‌ ره‌گه‌زنامه‌ له‌ ئیران، گۆرینی‌ ناو له‌ ئیران به‌ ئاسانی‌ نیه‌‌و ریگه‌ی‌ یاسایی‌‌و ئیداری‌ زۆری‌ ده‌وی‌، ئه‌ویش ئه‌گه‌ر به‌ په‌سندی‌ ئه‌نجومه‌نی‌ بالای‌ ره‌گه‌زنامه‌ بگات، هه‌ر چه‌ند كۆمه‌لێك مه‌رجی‌ نه‌گۆریشی‌ تیدایه‌. له‌ گه‌ڵ ئه‌وه‌ی‌ كه‌ ده‌بیت هۆكارێكی‌ یاسایت بۆ گۆرینی‌ ناوه‌كه‌ت هه‌بیت، ئه‌مه‌ جگه‌ له‌وه‌ی‌ تو ناتوانی‌ پاشناوی‌ "الله‌" له‌ ناوه‌كه‌ت بگۆریت وه‌ك "حبیب الله‌"یا "یدالله‌"، یا گۆرینی‌ ناوو نازناوی‌ ئیمام‌و كه‌سایه‌تیه‌ ئیسلامیه‌كان‌و گۆرینیان به‌ ناوی‌ تر ناكرێت. بۆ نمونه‌ تو ناتوانی‌ ناوی‌ "فاتمه‌" بكه‌ی‌ به‌ "ئاناهیتا". یه‌كه‌م شناسنامه‌‌و یه‌كه‌م ره‌گه‌زنامه‌ی‌ ئێرانی‌! ئه‌گه‌ر چی‌ دامه‌زرانی‌ یه‌كه‌م به‌ریوه‌به‌رایه‌تیه‌كانی‌ ره‌گه‌زنامه‌ له‌ جیهان ده‌گه‌رێته‌وه‌ بۆ سه‌ره‌تاكانی‌ سه‌ده‌ی‌ نوزده‌یه‌م، به‌لام له‌ ئێران‌و بۆ یه‌كه‌مجار دانانی‌ ئه‌م به‌ریوه‌به‌رایه‌تیه‌ ده‌گه‌رێته‌وه‌ بۆ رۆژی‌ 30 سه‌رماوه‌زی‌1297 له‌ تاران وه‌ك به‌شێك له‌شاره‌وانی‌ به‌ په‌سندی‌ ئه‌نجومه‌نی‌ وه‌زیرانی‌ ئه‌و كات ده‌گات‌و 3 رۆژی‌ دوای‌ ئه‌وه‌ش یه‌كه‌م شناسنامه‌ی‌ ئێرانی بۆ كچیك به‌ ناوی‌ "فاتمه‌ ئیرانی‌" دروستده‌كرێت. سالی‌ 1313 نازناو یا ناوی‌ بنه‌ماله‌یی‌(شهرت) بۆ هه‌موو ئیرانیه‌ك به‌ یاسایی‌ ده‌كرێت‌و هیچ ناوێك بی‌ نازناو له‌ شنانامه‌ نانوسرێت.

ڕێکه‌و
به‌شی ( ڕاپۆرت و لێکۆڵینه‌وه‌‌ )