من كوڕی خانەوادەكەیان نیم و هەڵەبجەییم  
صورة
گەنجێكی كورد لەشاری سنەی رۆژهەڵاتی كوردستان، خۆی وەك یەكێك لە ونبووانی سەردەمی كیمیابارانی هەڵەبجە دەناسێنێ و داوا لە بەرپرسانی ئەو پارێزگایە دەكات بیبەنەوە بۆ زێدی خۆی. ئەو گەنجە ئێستا تەمەنی بووەتە 27 ساڵ و دەڵێ‌ "باوكم پێش ئەوەی كۆچی دوایی بكات، پێیگوتم تۆ خەڵكی هەڵەبجەیت". ئەو رۆژەی دانیشتووانی هەڵەبجە لە مەرگێكی بەكۆمەڵ هەڵدەهاتن و هەموو هیوایەكیان ئەوەبوو بگەنە سنوورەكان. بارزان منداڵێكی تازە لەدایكبوو بوو بە باوەشی باوكییەوە، هەرچۆن بوو گەیشتنە سنوور و تیمە فریاگوزارەكانی ئێران گەیاندیانە نەخۆشخانەیەك. بارزان ئەوكات تەمەنی تەنیا 9 مانگ بووە.

بەهۆی ونبوونی چەندین منداڵەوە كە هێشتا دەدۆزرێنەوە، یان ئەو بەركەوتووانەی چەكە كۆمەڵكوژەكە كە هێشتا بەشێكیان بەسەر قەرەوێڵەی نەخۆشخانەكانەوە ژیان بەسەردەبەن، چیرۆكی هەڵەبجە و ئازارەكانی كۆتاییان نایەت. دیرۆكێك كە هێشتا شاران و وڵاتان دەگەڕێ‌، پێدەچێ‌ گەڕانەوەی بارزان كەرنەڤاڵی ئازار و گریانێكی دیكە بەدوای خۆیدا بهێنێ.
ئەو منداڵە ونبووە دەڵێ‌، لەلایەن فەرمانگەیەكی شاری سنەوە دراوەتە خێزانێكی كوردی ئەو شارە. لەبەرئەوەی دایك و باوكە تازەكەشی منداڵیان نەبووە، ئەركی بەخێوكردنی ئەویان گرتووەتە ئەستۆ. هەوڵدانی ئەو گەنجە بۆ دۆزینەوەی كەسوكاری لەكاتێكدایە كە ئەمڕۆ 27 ساڵَ تێدەپەڕێت بەسەر ساڵڕۆژی كیمیابارانی هەڵەبجە كە بەهۆیەوە نزیكەی پێنج هەزار هاووڵاتی شارەكە گیانیان لەدەستداو چەندین هاووڵاتی دیكەش ئاوارەی كۆماری ئیسلامیی ئێران بوون. چەند ساڵێك لەمەوبەر گەنجێكی دیكەی ئەو شارە بەنێوی (زمناكۆ) دوای چەندین ساڵ ژیان لای ئافرەتێك لەئێران، گەڕایەوە هەرێمی كوردستان و بەدایكی شاد بووەوە.
 
بارزان لە سنەی رۆژهەڵاتی كوردستانەوە چیرۆكی دەربەدەربوونی خۆی بدەگێڕێتەوە و دەڵێ‌ "ساڵی 1988 لەلایەن محەممەد باقر جەعفەری و پەروانە محەممەدی كە ژن و مێردێكی شاری سنە بوون، لە فەرمانگەیەكی ئەو شارە ئەركی بەخێوكردنی منیان گرتە ئەستۆ، بەڵام دایكەكەی سنەم لە ساڵی 2003 كۆچی دوایی كرد، هەروەها باوكە سنەییەكەشم 3 ساڵ لەمەوبەر بەیەكجاریی دنیای جێهێشت". بارزان خوێندنی زانكۆی لەبواری وەرزشیدا تەواو كردووە و ئێستا كۆمپانیایەكی هەیە لەبواری بازرگانیدا كار دەكات. بەدرێژایی ژیانی لەگەڵ دایك و باوكە رۆژهەڵاتیەكەی، دایكی ئەو نهێنییەی پێ نەگوتووە هەتا نهێنییەكەی بردووەتە ژێر خاك،
بەڵام دوای ژنهێنانی بارزان لە 2011دا، محەممەدی باوكی، سەرەتا ئەم نهێنییەی لای خێزانەكەی بارزان دركاندووە و دواتریش پێكەوە بە (بارزان)یان گوتووە "هەستێكی زۆر تایبەتم بۆ دروستبوو، لەوكاتەوە دەمەوێ‌ هەڵەبجە و خزمەكانم بدۆزمەوە" . بارزان دڵنیایە لەوەی خەڵكی هەڵەبجەیە و دەڵێت "ئێستا خاڵ و مام و پوورەكانم لە سنە دەزانن من كوڕی خانەوادەكەیان نیم و هەڵەبجەییم".
 
سەبارەت بەوەی ئاخۆ هیچ بەڵگەیەكی هەیە بیسەلمێنێ كە ونبووی كیمیابارانی هەڵەبجەیە، گوتی "بەڵگەكانم ئەوەیە كە لەو فەرمانگەیە خوێنی دایك و باوكم وەرگیراوە و ساڵی رابردووش هاتم بۆ هەرێمی كوردستان بۆ وەزارەتی شەهیدان و پاشانیش سەردانی سلێمانیم كرد بۆ پشكنینی DNA". چیرۆكی ژیانی ئەو گەنجە گەیشتووەتە لای كۆمەڵەی قوربانیانی هەڵەبجە و داوا دەكەن هەوڵەكان زیاتر بكرێن بۆ دۆزینەوەی كەسوكاری.
 
لوقمان عەبدولقادر، سەرۆكی كۆمەڵەی قوربانیانی هەڵەبجە دەڵێ‌ "قسەمان لەگەڵ بارزان كردووە و تەنیا كێشەمان دۆزینەوەی كەسوكارێتی. هیواداریشین هەوڵەكان بۆ ئەو مەبەستە بگەنە ئەنجام". بەڵام هەواڵەكان لەلایەن بەرپرسانی شەهیدانی سلێمانییەوە بۆ ئەو گەنجە خۆش نین، چونكە ئەوان دەڵێن لە قۆناغی یەكەمی پشكنینەكاندا دەركەوتووە بارزان كوڕی هیچ یەكێك لەو خێزانانە نییە كە كوڕیان ونبووە.
صورة
 
بەهادین محەممەد، بەڕێوەبەری گشتی شەهیدان و كاروباری ئەنفالكراوان لە سلێمانی دەڵێ‌ ئەو كاتەی باوكی ئەو گەنجە لەژیاندا بووە، تیمیان ناردووەتە شاری سنە و تاران و قسەیان لەگەڵ باوكی و كەسوكارو دراوسێكانیشی كردووە "ئەو گەنجە هاتە لای ئێمە و پشكنینمان بۆ كرد، لای ئێمەش چەند خێزانێك هەن كە منداڵیان ونبووە و بەپێی ئەو سیفاتانەی لەو گەنجە و خێزانەكاندا هەبوون، گومان بۆ 2 خێزان دەبرا، بەڵام دوای پشكنینەكە دەركەوت كوڕی ئەو 2 خێزانەش نەبوو". بەهادین محەممەد دەڵێ‌ ئەوە قۆناغی یەكەمی پشكنینەكە بووە و پشكنینی DNAی ئەو گەنجەیان لا پارێزراوە و هەر كاتێك خێزانێكی دیكەی هەڵەبجەیی بڵێت كەوا كوڕێكیان دیار نەماوە، ئەوا پشكنینی بۆ دەكەنەوە تا بتوانن خێزانی بۆ بدۆزنەوە. بەڵام بارزان گوتی هەتا ئێستا بەرپرسانی شەهیدان لە سلێمانی بەفەرمی پێیان نەگوتووە ئەنجامی پشكنینەكە بەو شێوەیەیە. بەڕێوەبەری گشتی شەهیدانیش ئاشكرای كرد كە لیژنەكەی ئەوان بە "زارەكی" لەو ئەنجامە ئاگاداریان كردووەتەوەو هەر لەهەوڵیشدا دەبن بۆ دۆزینەوەی كەسوكارەكەی.
 صورة
ڕێکه‌و 2015-03-16 20:50:01
به‌شی ( ڕاپۆرت و لێکۆڵینه‌وه‌ )